រាជធានីភ្នំពេញ៖ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាថ្ងៃទី២៤ ខែមេសានេះ ទ្រង់សព្វព្រះរាជហឬទ័យត្រាស់បង្គាប់លើកលែងទោសឱ្យទណ្ឌិតឈ្មោះ គង់ សភា ដែលត្រូវបានសាលាដំបូងរាជធានីភ្នំពេញ ប្រកាសផ្តន្ទាទោសដាក់ពន្ធនាគាររយៈពេល ៨ឆ្នាំ។ 

នៅក្នុងខ្លឹមសារនៃព្រះរាជក្រឹត្យដែលអង្គភាព EAC News ទទួលបាននៅរាត្រីនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្រោយទ្រង់យល់នូវសេចក្ដីក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ទ្រង់បានត្រាស់បង្គាប់ឱ្យលើកលែងទោសឱ្យទណ្ឌិតឈ្មោះ គង់ សភា ភេទប្រុស កើតឆ្នាំ១៩៧៥ ដែលត្រូវបានតុលាការសម្រេចផ្ទន្ទាទោសដាក់ពន្ធនាគារកំណត់រយៈពេល ៨ឆ្នាំ តាមអំណាចសាលក្រមស្ថាពរលេខ ៤១១ "គ" ក្រ៧ ចុះថ្ងៃទី១៧ ខែមិថុនា ឆ្នាំ២០២២ របស់សាលាដំបូងរាជធានីភ្នំពេញ។ 

គួរឱ្យដឹងថា កាលពីថ្ងៃទី១៨ ខែមេសា កន្លងទៅ តាមរយៈហ្វេសប៊ុកផ្លូវការសម្តេចធិបតី ហ៊ុន ម៉ាណែត នាយករដ្ឋមន្ត្រីបានឲ្យដឹងយ៉ាងដូច្នេះថា៖ "ជូនចំពោះលោក គង់ សភា ខ្ញុំបានទទួលរួចហើយនូវលិខិតសូមអភ័យទោសរបស់លោក។ ខ្ញុំសូមស្វាគមន៍លោក។ ខ្ញុំនឹងចាត់ចែងតាមនីតិវិធីដើម្បី អោយលោកអាចវិលត្រឡប់មកកាន់មាតុប្រទេសវិញ។ សង្ឃឹមថាយើងនឹងមានឱកាសជួប សន្ទនាជាមួយគ្នានៅពេលខាងមុខ"។

សូមបញ្ជាក់ថា សេចក្ដីក្រាបបង្គំទូលថ្វាយព្រះមហាក្សត្រស្នើឱ្យលើកលែងទោសរបស់សម្តេចធិបតី ហ៊ុន ម៉ាណែត ធ្វើឡើងបន្ទាប់ពីលោក គង់ សភា អតីតតំណាងរាស្រ្តមណ្ឌលស្វាយរៀង បានគោរពជូននូវលិខិតស្នើសុំអន្តរាគមន៍លើកលែងទោសមួយច្បាប់ជូនសម្តេចធិបតីកាលពីថ្ងៃទី៩ ខែកុម្ភៈ ឆ្នាំ២០២៤ ដើម្បីអាចឱ្យខ្លួនបានទទួលការសណ្ដោសប្រណី និងប្រោសព្រះរាជទានលើកលែងទោសពីអង្គព្រះមហាក្សត្រ ក៏ដូចជាដើម្បីឱ្យខ្លួនបានរួចផុតពីការចោទប្រកាន់ទាំងឡាយដែលមានជាធរមាន៕